Кіруючыся фразай “Знайсці сабе справу на малой радзіме”, з мэтай прафесійнай арыентацыі падрастаючага пакалення і ў рамках Года малой радзімы, навучэнцы і выхаванцы лагера працы і адпачынку ДУА “Сярэдняя школа №4 г. Касцюковічы” вырашылі як мага бліжэй пазнаёміцца з прафесіямі, якія запатрабаваны на Касцюкоўшчыне, каб абраць прафесію, вывучыцца і вярнуцца на малую радзіму спецыялістам.
Пунктам нашага падарожжа быў Беларускі цэментны завод. На тэрыторыі завода нас сустрэла, Іна Вячаславаўна Мамчанка, намеснік дырэктара па ідэалагічнай рабоце, кадраваму забяспячэнню і быту. Звярнуўшыся да падлеткаў, Іна Вячаславаўна папярэдзіла: “Галоўнае пры выбары прафесіі быць упэўненым, што праца прынясе чалавеку радасць, бо праца займае вялікае месца ў жыцці. Дзякуючы працы людзей, багацее краіна, а каб багацела краіна, трэба з душой працаваць і любіць свой завод, як любяць яго на сённяшні дзень працаўнікі”.
Іна Вячаславаўна пачала сваю размову з гісторыі ўзнікнення завода, паказала нам макет завода і запрасіла праехаць у горны цэх, (кар’ер “Высокае”), дзе пачынае свой шлях будучы цэмент - а дакладней, мергель - карысны выкапень, з якога пры перапрацоўцы і атрымліваецца цэмент. Стоячы ля кар’ера, хлопчыкі і дзяўчынкі “убачылі” працу горнага інжэнера, геолага, праекціроўшчыка, экскаватаршчыка, вадзіцеля пагрузчыка, вадзіцеля цеплавоза, мантажніка.
Далей, мы наведалі іншыя цахі, даведаліся, што тут вырабляецца 17 відаў цэменту і пазнаёміліся з прафесіямі абпальшчыка, кантралёра, аператара, будаўніка, укладчыка-упакоўшчыка і многімі іншымі.
Цікава ведаць, што бацькі нашых навучэнцаў працуюць на заводзе, а гэта вельмі важна, бо дзеці з дзяцінства знаёмяцца з прафесіямі завода. А яшчэ мы даведаліся, што на заводзе існуюць 57 спецыяльнасцей, і завод дае мэтавыя накіраванні на навучанне, ды яшчэ асобая ўвага надаецца маладым спецыялістам, ахове законных інтарэсаў у сферы прафесійнай дзейнасці.
Дзякуем Іне Вячаславаўне за цікавую экскурсію і ўпэўнены, што некаторыя з нашых навучэнцаў праз некалькі гадоў папоўняць працоўны калектыў Беларускага цэментнага завода.
Вярнуўшыся ў школу, навучэнцы і выхаванцы пад уражаннем убачанага, доўга эмацыйна абмяркоўвалі важнасць і патрэбнасць прафесій, з якімі пазнаёміліся.